Bungong jeumpa di panton giri
Bungong meulati di Kuta Raja
Bacut lon kisah keu mandum akhi
Soal adiksi Pelatihan Napza

Bak urou Rabu phon-phon mulai
Kamoe ka geubri pelatihan Napza
Laju geu-bahas le para ahli
Para praktisi dan jajaranya

Acara geu-buka ngon seremoni
Bak geudong tinggi didalam Aula
Oleh Direktur peu-tuah geubri
Ilmee adiksi beu tatem baca

Ngon manajemen cukop that meukri
Geu atoe rawi le panitia
Bidang PSDM geu undang ahli
Nyang bri materi pelatihan Napza

Qanun ngon hukom le dokter Yessi
Geutamah lagi grafik ngon data
Dokter Arif dian bacut geu-saji
Macam adiksi dan jenis-jenisnya

Soal HIV geu wanti-wanti
Geu bri materi leungkap lagona
Le dokter Mahkrozal geu-bahas jeli
Bek le tabenci keu pasien ODHA

Pak Subhan Rio geu joek materi
Tanda ngon dali aneuk remaja
Beuna tajaga putra ngon putri
Bek roeh disudi deungon narkoba

Laen nibaknyan kamoe meuriti
meuduk that rapi bareh meubanja
Dokter Syahrial laju berdiri
Soal adiksi laju geubuka

Dampak akibat ngon implikasi
Bak-ureung banggi keunong narkoba
Rusak dum saraf badan ka leupi
Akibat dekti pakek narkoba

Laen dum soal geubahas lagi
Le rekan Ahli meumacam rupa
Lhee uroe sabe kamoe meu-antri
Geu joek ie-kupi ngon asoe kaya

Meu-mada o'hno kisah lon rawi
Tentang Adiksi Pelatihan Napza
Terimong gaseh wareh ngon wali
Tanyoe Allah bri udep sijahtra.

Husaini Adnan
26/2/2021